کلامِ اقبال------- آشنا اپنی حقیقت سے ہو اے دہقاں ذرا

Allama Iqbal

آشنا اپنی حقیقت سے ہو اے دہقاں ذرا
دانہ تو، کھیتی بھی تو، باراں بھی تو،حاصل بھی تو

آہ، کس کی جستجو آوارہ رکھتی ہے تجھے
راہ تو، رہرو بھی تو،رہبر بھی تو، منزل بھی تو

کانپتا ہے دل تیرا اندیشہٴ طوفاں سے کیا؟
نا خدا تو، بحر تو، کشتی بھی تو، ساحل بھی تو

دیکھ آ کر کوچۂ چاکِ گریباں میں کبھی
قیس تو، لیلیٰ بھی تو، صحرا بھی تو، محمل بھی تو

وائے نادانی کہ تو محتاجِ ساقی ہو گیا
مے بھی تو، مینا بھی تو، ساقی بھی تو، محفل بھی تو

شعلہ بن کر پھونک دے خاشاکِ غیراللہ کو
خوفِ باطل کیا؟ کہ ہے غارت گرِ باطل بھی تو

بے خبر! تو جوہرِ آئینۂ ایّام ہے
تو زمانے میں خدا کا آخری پیغام ہے!!ٔ